Hoërskool Riebeeckrand Geanker in geloof

Coca-Cola Rugby - Roodepoort Rugbyklub

Hoërskool Riebeeckrand sien baie uit na vanjaar se Coca-cola rugbyreeks wat jaarliks by Roodepoort rugbyklub plaasvind. Skole soos Monument, Middelburg, Kemptonpark, Florida en Marais Viljoen is van die skole wat aan die toernooi deelneem. Die afrigters van die span, Mnr. Devon Tromp, Mnr. Boetie Luus, Mnr. Bertus Luus en Mnr. Ruan McAllister glo dat die toernooi perfekte voorbereiding vir die 2015 rugbyseisoen gaan wees. Die afrigters en spelers is reeds besig met voorbereiding vir die toernooi en wil die jaar ‘n impak maak met positiewe rugby en goeie sportmanskap. Voorbereiding word reeds deeglik gedoen en oefening vind plaas vanaf half 5 op die a-veld. Die O/15 rugbyspan neem ook deel aan die O/15-afdeling van die toernooi en sal graag saam met die senior span die skool se naam wil hoog hou. Riebeeckrand sê sterkte aan die afrigters en seuns.

Riebeeckrand klop Alberton in liga semifinaal

Die O/15 rugbyspan van Hoërskool Riebeeckrand het Saterdag, 21 Junie 2014, kragte gemeet in die semifinaal van die liga teen Hoërskool Alberton. Die spelers se vaardighede was puik en het van die afskop af gewys dat hulle die sterker span was op die dag. Reck Mare het die 1ste drie vir die dag gedruk, daarna het Quintin Roux twee keer oor die doellyn gestorm. Riebeeckrand het met 'n telling van 17-10 gewen. Saterdag, 2 Augustus 2014, speel Riebeeckrand in die finaal teen Helpmekaar Kollege. Die span kwalifiseer ook vir die uitspeel wedstryde van die Beeld trofee. Baie geluk aan die seuns en sterkte met die wedstryde wat voorlê.